Ds Turnfescht in Domat/Ems – wo föh mir da am beschte ah? Nach dem d Startzite si bekannt gäh worde, het d Conä äuä no einisch über die ganzi Planig müesse. Startziit vom Fachtest und Wurf 9:12, Sektionsprogramm 9:24. Wüu der erscht Zug am Samschti morge nid glängt hätti, het me ner beschlosse, doch scho am Fritiabe azreise u 2x am Turnfescht z übernachte.
Auso isch de Friti der 14.Juni cho u der TVK het sech uf die Reis ids Bündnerland begäh.
3h Zugfahrt – zersch vo Bärn uf Züri u dert simer när umgstige u hei der Zug gno Richtig Chur. D Conä isch leider a dem Turnfescht spontan usgfalle wege ihrer Lungeentzündig u i bi da chli iz chaute Wasser gschosse worde. Alli Unterlage hani imene Mäppli gha, dasi de ja nüt vergisse u dass de das bir Ahmeldig alles problemlos verlouft. Es het gheisse der Zibä lütet de no a, wüus im Team Friti villech no Änderige git für d Ahmäuig. Ufem Weg dert härä het ner mis Telefon glüte u der Zibä het ahglüte. Er het mir die genaue Zahle ahgeh u gseit der Rickli cha nid cho, wüu er sini Lippe quetscht het. Auso hani mir das aues gmerkt u meh het ner afah drüber spekuliere wiesech der Rickli gschafft het sini Lippe z quetsche. Da si jenschti Theorie ufgstellt worde. Uf Platz het sich ner aber relativ schnell usegstellt, dasi da am Telefon chli öppis falsch verstande ha u der Rickli nid d Lippe, sondern d Rippe quetscht het.
Wo der Zug langsam in Domat/ Ems isch ihgfahre, het der Silvan lut mitteilt: «Da müesse mer use» u niemer het das ahzwiflet. Dusse ufem Perron isch nid klar gsi, i weli Richtig mir iz gnau müesse, bis de öpper gmerkt het, das mer am falsche Bahnhof si usgstige. Das obwohl üs d Conä no extra het druf ufmerksam gmacht, das mer de ersch in Domat/Ems Werk seue usstige! Auso heimer haut ufe nächst Zug gwartet. Der Fäbu u der Gürbi hei üs die Warteziit aber chli verkürzt, indem si grad einisch d Team Aerobic Cjleider vor Fabä ahpobiert hei.
Am Turnfest ahcho heimer d Zelt ufgstellt u si ner churz druf abe gah Znacht esse im Resti, wo d Conä scho im Vorus für z Znacht reserviert het. E risse Tisch, schön dekoriert, isch für üs parat gsi. Reserviert heimer für 30 Lüt, aber mir si nume 15 gsi; wo isch de der Rescht u wer chunnt überhoupt no? Irgendwo isch da eue e Fehler passiert aber ds Restaurant hets glasse gno. Guet gsättiget simer ner zrügg u de mau gah lige, wüu der Wettkampf heimer ja no vor üs gha.
O z Wetter hets nid so guet weue mit üs. Scho am Friti hets chli ahfah regne u am Samsti isches ner relativ trostloses Wetter gsi; es het der ganz Tag eifach gschüttet u so langsam isch ner der Matsch o zum Vorschiin cho. Da hei vor allem die, wo d Gummistiefel hei mitgno, z goldige Los zoge u alles absolut richtig gmacht.
Am Samsti gege Abe hets de einisch doch no paar Minute chli uftah u das Sunnefänschter isch de vom einte oder andere gnützt worde füre Social Media Content.
Aber o das Wetter het üs nid drvo abghalte, das wo mer güebt hei z zeige u z Beschte drus use z hole. Nacheme glungene Wettkampf heimer üs ner mit der Männerrige troffe für es Apero u hei uf e gueti Leischtig chönne ahstosse.
Drufabe isch mä ner gah dusche. D Froue si uf die grandiosi Idee cho meh chönnt ja id Turnhalle gah dusche, dert sigs sicher warm u gäbig mit Spiegel u meh het Platz. Das isch du o e Wunschvorstellig gsi, wie mer hei müesse merke.
Dert ahcho isch d Garderobe gstungget voll gsii wüu mer eue nid die einzige mit dere Idee si gsi. U meh het de schnell müesse merke, dass d Duschine iischchaut si gsi, wüu z Warmwasser isch usgange. Ke angeri Wahl – auso het meh halt chalt duschet u die ganz Herte hei sogar no d Haar gwäsche. Wo mä isch zrügg cho, isch ner uscho, dass die mobile Duschine no riichlich warms Wasser hätte gha u die chalti Duschi relativ eifach hätti chönne vermide werde…
Ner isch me de langsam aber sicher gah Znacht esse ude churz druf abe i Usgang gstartet. Es het sech im Verlauf vom Abe usegstellt, dass di Jüngschte no am Beschte u Lengschte möge. Si si a ihrem erschte Turnfest grad z oberscht uf de Baloxe gstande u si unermüedlich gsi, nid so wie anderi. Zum Beispiel dr Gürbi hets irgendwenn nümm gseh, het e französische Abgang gmacht u isch iz Zelt ga e Weltruumdoku luege.
Am nächschte Morge heimer de d Zelt zeme packt u üs langsam ufe Weg gmacht für hei. Natürlich denn het sich z Wetter no schnell vor beste Site zeigt. Aber alli si us unerklärliche Gründ chli müed gsi u froh langsam hei z gah.
Verfasst von Nuna Romang
Neueste Kommentare