D Wätterprognose si guet gsi für ä 13./14. Septämber,so das mir üs am 9i guet gluunt u gschterkt dür nes Kafi mit Gipfeli (Merci Chrige) mit 11 E-Bikes u zwöi Biovelo uf üsi spezieui Reis gmacht hei. Für ne Lacher het dr Verfasser vo däm Bricht gmacht wiu är ds Abstyge nid güebt het. Für Ufregig hets bereits vor Uettlige gäh wiu mir vomene Damenvelo ohni Motor überhout worde si. Dr Wäg, vom Jöchu guet rekognosziert, het üs übers Mühlebärgwehr bis uf Biberebad gfüert. Nach em Imbiss u Durschtlösche si mir via Gurmels, Villarrepos übere Bärgrügge Richtig Avenches gfahre. Bim Aventikum hets auerhand gäh zum Ahluege,sigs im Museeum oder im Stedtli. Wäge de ufziende Wueche hei mir d’Velo gsattlet u si Richtig Murte gfahre. Ds Murte isch dr Stadtlouf im Gang gsi, drum het dr Bäsewage mit em Fritz nid chönne vor ds Hotel fahre. Nach em Zimmerbezug hets üs bim Apero doch no verrägnet. Ds feine Nachtässe mit meh oder weniger zarte Steaks, u Ussicht uf ä See, ufmerksams Pärsonal isch prima gsi. Nach em Stadtbummu mit Zwüschehaut, si äs Par wenigi ga lyge. Dr Räschte het doch no äs Lokau für ne Schlummerbächer gfunge u het no Aplous für ds Singe übercho. Dr Jüre het im Usgang mit äxtra agmässene Hose vieu Lob übercho.
Bim rychhautige Zmorgebüffet hei mir üs gsterkt für d’ Ringmuur Besichtigung u d’Wyterfahrt, bi schönschtem Wätter dür ds Seeland mit früsch gladne Maschine. Ä churze Kaffehaut ds Muntelier im Camping, rassigi Fahrt mit Rüggewind dür ds Gmüesland über über Kerzers, Golaten uf Aarbärg. O dert isch ä Veranstautig im Gang gsi. Mir hei trotzdäm üse Durscht chönne lösche u dr Wale isch no aus schöne Ma tituliert worde. D’Wyterfahrt über Lyss bis Schüpfe isch rassig gange. Dr Bärgprys uf ä Schüpbärg het dr Schryber usglah, het aber vernoh das Aui gnue Strom hei gha, u sogar no hei mit heignoh. Zytig daheim acho, mit ä chli Schmärze im Hingerteu u de Wadli, hei mir ä super Reis ohni Panne, Defekte u Unfäu dörfe erläbe.
Jöchu merci vieu Mau!!! Es isch super gsy.
Verfasst von Hans Gautschi
Neueste Kommentare