«Jung & wändig» im schöne Wallis, wo d Sunne immer schiint…
25.
Am Samstimorge het sich üses chline Trüppli direkt bim Gleis am Bahnhof Bärn troffe. Wo dr Zug zum Start vo dere Riegereis scho 5 Minute Verspätig het düregäh, het d Conä gad es chlises Flashback ad Riegereis 2021 im Tessin gha. Uf dr disjährige Reis ids Wallis ischs zum Glück de di einzigi Zugverspätig blibe.
Ä gmüetlechi Zugreis hei mir gha richtig Belalp. Ungerwägs het üs d’Leo di sogenannti TUKI- Challenge erklärt, ä spannendi Sach mit Detektive u äre Grichtsverhandlig. Wo mir mitem Gondeli obe uf dr Belalp si acho, hets de o grad dr erst Gipfuwii gä. D Walliser hei aber chli komisch glugt u glost; Wii vo Chile hie bi üs im Wallis? Tja wie ou immer… Mir hei üs de mit guete Rägechleider uf ds Wiitüürli gmacht, wos nätürlech feine iheimische Wii zum probiere het gä (Für di Schwangere hets anstatt vom Wii äs super feins Siruptüürli gäh). Scho nach dr erste Station hei mir üs verrägnet ufä Wäg is Restaurant «Hamilton Lodge» gmacht, wo mir üses Zmittag hei dörfe gniesse. Was dert nid isch iplanet gsi, isch ä spontane Abstächer ids Spa. Nach langem hin und här mit dr Hotelbsitzerä hets ömu de klappet. Danke hi nomau üsnä Organisatorinne für ihri Spontanität. Gad mitem sexy Hamamtuech hets haut o passt zum Motto vor Riegereis: «Jung & wändig». So si mir de richtig ufgwermt no schnäu schnäu di rästleche Wiie vom Wiitüürli ga abhole. Es wär ja de o cheibe schad gsi, we mir die nid hätte chönne probiere. Mir hei würk chlei Gas müesse gä mit loufe, dasses no grad pünktlech ufs Gondeli für abe is Tau glängt het.
Mit Bös, Zug, ämä Fuessmarsch u Poschi ischs richtig Ungerkunft gange. Ungerwägs hets paar lustigi Gspräch mit Iheimische gä. Üs isch sofort glehrt worde, dassmä hie scho vom Mittag a «Guete Abe» seit. Uffgfaue isch üs o, dassmä mit ämnä Wii ihr Hang im Wallis schnäu zumnä Magnet wird.
Ihr Ungerkunft z Jeizinen hei d Therese u ihre Hung d Gloria üs härzlechst ämpfange, äs wunderbars Walliserplättli zum Apéro isch oscho parat gsi. Ja d Therese hets guet gmeint mit üs, so het d Portion vom Znacht gloub niemer möge ufässe. Bim Ässe het sich dr TUKI doch zum erste Mau bemerkbar gmacht, äs «T» isch uf eim Täuer dekoriert gsi. Hmm wär isch äch dr heimläch TUKI? Nachem Ässe hets no ä Spiuabe gäh, Diskussione vo auer gatig Würm und Witze wo mäh d Rahel sicher (nid) zum Lache bringt. Ja ou künstlerisch hei mir üs betätiget. Bis hüt isch aber unklar, öb die Person uf äm Biud würk är Julä glicht. U wär schaffet iz scho wieder bim Striich? Äs isch uf jedefau ä lustige Abe gsi.
Usgschlafe hei mir üs am Sunntimorge bimnä herrläche z Morgebuffe gstercht u de ischs am haubi 10ni los gange uf üsi Wanderig richtig Goppestei. Dr Räge hets hüt chlei besser gmeint mit üs, so dasses nur zwüschedüre mau paar Tropf het gä. Nur si de Paari rächt verunsicheret gsi, öbs iz besser mit Rägehose u Rägejagge isch oder viellicht glich ohni. Mä het sich de für di zwöiti Variante entschide und haut chlei speter de wieder müesse ahaute für öbis azlege. Nach 3 Stung wandere hei mir ou dr steil Abhang schön langsam gmeisteret gha. Z Goppestei hei mir im Restaurant Felsheim no churz Zit gha, eis ga z näh bevor mir am 1 mitem Zug wieder richtig Bärn si. Im Verlouf vo dr Heireis isch no uscho, wär dr heimlech TUKI gsi isch. Dr Ädu het das auso ganz klever gmeisterät, das muess de scho gseit si.
Jung & wändig, das ischs gsi! Merci Rahel u Leo für z organisiere u danke dene wo si drbi gsi, es isch äs tolls Wucheendi gsi.
Verfasst von Linda Hofer
Neueste Kommentare